បន្ទាយមានជ័យ៖ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានសមាគមមូលនិធិមនុស្សចាស់ខេត្តបន្ទាយមានជ័យ លោកឧបនាយករដ្ឋមន្ត្រី កែ គឹមយ៉ាន បានថ្លែង ដោយជំរុញឱ្យមានការយកចិត្តទុកដាក់ក្នុងការផ្ដល់ភាពកក់ក្ដៅជូនមនុស្សចាស់ ដោយថាមានមនុស្សចាស់ទើបមានកម្ពុជាបច្ចុប្បន្ននេះ។
ក្នុងសន្និបាតសមាគមមូលនិធិមនុស្សចាស់ខេត្តបន្ទាយមានជ័យ អាណត្តិទី២ នៅសាលាខេត្តបន្ទាយមានជ័យ កាលពីថ្ងៃទី៣ ខែមីនា ម្សិលមិញលោក កែ គឹមយ៉ាន បានថ្លែងថា៖ «ពិតណាស់មនុស្សចាស់ បានបន្សល់ទុក្ខនូវស្នាដៃកេរ្តិ៍ឈ្មោះដ៏ត្រចះត្រង់មិនអាចកាត់ថ្លៃ និងបានពលីគ្រប់បែបយ៉ាងការពារជាតិមាតុភូមិពីការឈ្លានពានទឹកដី ដោយបានបូជា លះបង់សាច់ស្រស់ ឈាមស្រស់ ក្រុមគ្រួសារដើម្បីជាតិ រហូតដល់ប្រទេសជាតិទាំងមូលទទួលបានសុខសន្តិភាពក្រោមគោលនយោបាយឈ្នះឈ្នះ របស់ប្រមុខថ្នាក់ដឹកនាំដ៏ឆ្នើម ដែលមានសម្តេចតេជោ ហ៊ុន សែន ជានាយករដ្ឋមន្ត្រីប្រែក្លាយពីប្រទេសដែលធ្លាក់ក្នុងភ្នក់ភ្លើងសង្គ្រាមដ៏ខ្មៅងងឹតរហូតមានការអភិវឌ្ឍរីកចម្រើនទៅមុខជាលំដាប់» ។
យោងតាមរបាយការណ៍របស់សមាគមន៍មូលនិធិមនុស្សចាសខេត្តបន្ទាយមានជ័យ បានឱ្យដឹងថា ស្ថិតិមនុស្សវ័យចាស់សរុបចំនួន ៦៦ ០៧០នាក់ (ស្រី៣៧ ៩៣៧នាក់) ក្នុងនោះ អាយុចាប់ពី៦០ ដល់៦៩ឆ្នាំ សរុប ៤២ ៤៩២នាក់/ស្រី ២៣ ៦៧៤នាក់ អាយុចាប់ពី៧០ ដល់៧៩ឆ្នាំ សរុប ១៦ ៩៧៦នាក់/ស្រី ៩ ៩៣៥នាក់ អាយុចាប់ពី ៨០ឆ្នាំឡើង សរុប ៦ ៦០២នាក់/ស្រី ៤ ៣២៨នាក់៕
